Mitologi Tarigan Sibero -- Cerita Rakyat dari Karo

Lit me ndube keramat ngerajai kerangen limbu raya taneh Empak-Empak (Negeri Perahu). Ia ndube tading i Luhung Gowa Tong-tong Batu.

 
Sada paksa lawes ia mbentasi kerangen Tong-tong Batu nari narih-narih ku Juhar. Seh Juhar salih jadi jelma.

Jumpasa sekalak singuda-nguda, anak pulu taneh. Empoina beru Pulu Taneh Juhar, Ginting Mergana. Tubuh ndube anakna empat kalak. Erkiteken perjabunna ras jelma maka telu anakna la jadi jelma.

👉Kerna anak Sintua, salih ndube jadi umang keramat mulihken ku Tong-Tong Batu. 

👉Kerna anak sipeduaken, erkiteken empat jari-jarina, salih ndube jadi Arimo (Harimau). E maka na nigelari Arimo Tarigan, curak gatipna empat empat ngenca ibas dagingna (La Erkesehen).

Ia jadi raja kerangen, kerangen limbu raya, kerajanna ngalur-ngalur kerangen Empak-Empak seh ku taneh Juhar. Emaka kalak Tarigan nipantangken mekpek entah pe munuh arimo.

👉Kerna anak si peteluken, ia menam bagi jelma, tapi labo jelma, dagingna ersisik, perdalanna nggawang. Erkiteken sisikna maka ku lau atena usur.

 
Nggawang ia ngalur-ngalur lau mbelin tangkuh bas batang berou (bero). Batang Bero ndube inganna nggawang-nggawang dingen inganna tading. Palu gendang dur batang-batang bero ngalur-ngalur lau, ndilo gelah mulih, tapi lanai ia nggo mulih. Jenari nigelari me Tarigan Si Bero.

👉La ndekahsa tubuh me anakna singuda, bebere Pulu Ginting Juhar. Sekalak anak dilaki. Tempasna nggo bagi jelma. Dem ningen la dem, la dem ningen dem ka jelma. Ia ndube tading i Taneh Juhar.

Empoina anak pulu Kuta Juhar. Ia me mbenai sinursurna nigelari Tarigan Sibero. Anakna lit dua dilaki ;
👤Anakna Sintua ndube tading i Juhar, ngiani Jambur Suki. Usur turah perubaten ibas jabuna. Seh maka anak-anakna marpar merap. Lit sinursurna lawes kempak Timur (Simalungun?) seh maka sinursurna nigelari Tarigan Tua entah pe Tarigan Purba.
👤Anak singuda tading ras nandena i Juhar. Ia ndube ngiani rumah tinading nandena i Jabu Jambur Lateng. Anak singuda usur jadi pendamen man jalak sirubat i tengah-tengah kuta.

 
Bagi e me turi-turin si Tarigan Sibero.

Oleh : AndichristTheodicea KaynEchsed Ginting